Pengerindu Sebayan - Part 1

Kala enda kita meda ayas orang ti udah nadai sereta berandau enggau sida ? Kala enda kita berunding nama penyandi enggau kitai enti udah lela baka leka jawa, lenyau baka leka lingkau, lesi nengali ari, parai nengali lemai ?

Nyadi aku Remy, siko indu ti diberi petara lansik mata baka jelu ukui & manuk ti ulih meda antu sebayan. Ari mit aku dikumbai sida apai gila ti ngujung ke selalu dibai sida apai berubat. Aku dikumbai sida doktor bisi penyakit mental meda aku tu selalu bejako kediri serta rindu bemain kediri. Mayuh bala nembiak enda rindu bepangan enggau aku laban ko sida, aku tu sakit sereta enda manah pendiau. Mayuh endur berubat bai bala sida apai tang nadai mai pengerai. Aku tetap ulih meda sebayan. 

Enti lebuh ku bejalai pulai sekul, aku suah amat bepansa enggau semengat orang ke udah nadai. Laban ke agi mithttp://ceceliarimong.blogspot.com/?m=1sereta enda nemu utai, kekadang ku nyapa sida. Mayuh sekeda tekenyit, nyabak lalu madah diri empu sunyi sereta minta tolong laban aku ke ulih meda sida. Ke mayuh agi sida nuu nyabak madah diri empu sunyi sereta enda ngasoh aku bebakih enggau sida.

Pemuas dikumbai orang gila, kami sebilik suah amat bepindah rumah laban sida apai enda tan meda aku dikembelik ke orang.

Bisi sigi insiden tu, lebuh aku ke pulai sekul. Aku bisi ninga sada nyawa nembiak mit nyabak ba tisi jalai damping enggau simpang empat. Setiap kali aku mansa endur nya, nembiak nya semampai dipeda aku nyabak. Kali tu, aku enda kiruh laban aku nemu nya semengat orang ke udah mati.

Tu kelima kali kami pindah rumah.
" endu, aku enda nemu nama utai ba nuan serta enda mereti ke nama utai selalu dipadah nuan. Enti nuan amat ulih meda utai nyelai, aku minta kasih ari nuan badu meh nuan kiruh ke utai jai bakanya. Enti nyema nuan bepansa tauka tepeda ke sebayan, ngaga diri empu enda meda meh nuan. Aku enggai meda nuan dikumbai orang enda manah pendiau, apai ka meda nuan baka nembiak lain bisi bakih. Apai enggai meda nuan kediri. Anang kiruh berandau enggau sida, buta ke mata, tuli ke pending." pia ko jako apai. Jako nya dingat ke aku serta aku ka baka orang lain, bisi kaban serta idup baka orang normal. Aku enggai bisi kuasa ti baka tu.

.................................