Paaaaaannnnnggggggggggg!
Jari apai terengkah ba kuyu aku. Tu meh terubah iya apai datai jari ngagai aku. Nadai nyangka pekara ti bansa tu diterima aku. Ku jaku deka bekungsi penusah enggau orang ti dikesayau tang nama daya aku enda ulih ngelaban.
Apai! Nuan enda nemu nama utai diasai anak nuan tu! Anak nuan benung merinsa! Apai! Pedis apai! Sabak nadai meh guna laban nuan enda arap ka jaku anak nuan! Kasih aku apai! Enti nyema baka ngena baju mata aku tu apai, betukar meh mata tua apai awak ke nuan pechaya ke anak nuan tu. Kasih anak nuan tu apai, lain meh anak orang idup meruan lantang nadai utai ngachau ngeregau. Semina ulih ngeransik dalam ati diri empu laban enda ulih tepansut ke leka jaku. Berasai angat kuyu bekau ditampar apai.
Becherita ke semua utai ke nyadi lebuh pulai sekula tadi ngangai indai sereta apai enda nyalah baka nibarka jala enda betating. Bejaku mayuh pen enda meh diguna orang.
"Apai udah madah! Sebayan! Antu! Utai nya nadai ba dunya! Utai ku nuan semina igau nuan aja! Udah Remy! Badu ngenusut ke runding apai, diatu nuan badu nurun ke sekula agi! Meri nuan tuyo ke sekula nya" ku anu apai. Mua apai nyau merah enda nyalah baka mua orang baru pulai bejembi. Indai semina diau diri aja sereta nadai ati deka ngelantang ka aku.
Indai, aku nemu semina nuan siku aja dikarap ka aku diatu. Tulung anak nuan tu awak ka apai mereti ke jaku aku.
Aku merening indai ti duduk diau diri ari tadi. Minta kasih nuan indai, padahka apai awak iya arap ka jaku aku. Semina mata indai aja ke meda tang pending enggau mulut indai baka udah ditejal ngena gari utai. Seleka jaku pen nadai pansut ari mulut indai. Nama baru diatu nuan enda kiruh indai ? Nama enda ari bukai nuan ngalih mua meda aku indai ? Aku ukai anak nuan indai ?
Nadai meh medis tu utai kala diasai ke aku. Pia apai diri empu ngumbai anak iya tuyu, tu indai diri empu bebali ati meda anak diri merinsa bakatu.
Terima kasih ke jaku nuan apai, pia mega nuan indai ti nadai ibuh ke anak nuan tu nyangka nya nuan udah nadai pengerindu ke anak nuan tu laban anak nuan tu enda baka pendiau anak orang bukai. Bepun ari tu, badu meh anak nuan tu bekungsi ke pemerinsa diri. Badu meh nuan apai ninga sebana anak nuan tu agi. Diatu anak nuan nemu, nadai orang agi ke diarap ba dunya tu.
Berat kaki disingkang, utai dipeda nyau baka meda cermin kabur, berambun ai mata sereta ati ti anchur laban pengarap ngangai apai indai udah nadai agi semina aku siku aja nemu. Datai dibilik, aku lalu ngelabuh ke diri ke peninduk enda nyalah baka burung ngerembah ke diri ke sarang diri. Semina sada nyawa apai aja didinga ti benung kerah-kerah bejaku ba ruang tamu.
Enda kala apai ngaga aku bakatu, nyangka apai sereta indai udah putus pengarap napi penguji.
Bilik tu meh ke saksi aku sari tu, jemah ila bisi maya nuan indai apai nerima pemerinsa ti sebaka enggau aku. Awak petara ngambi semua utai diberi iya ke nuan pulai baru. Dia meh seduai ila nesal sereta pechaya ke jaku aku.
.....................................................
Udah beberapa bulan aku enda nurun sekula pia mega aku enda diasuh sida apai pansut ari rumah enggai ke penyakit tuyu aku mulan baru. Aku diketu ke apai besekula enggau bala mayuh tang taja pia apai bisi ngaji tutor ngajar aku kediri ba rumah. Apai enda sampai ati meda aku ngeleka ke pelajar aku pia aja nya alai apai ngaji tutor awak bisi ngemata ke aku belajar kediri di rumah. Laban ke gawa tiap ari apai enggau indai ninggal ke aku kediri enggau tutor. Enti nyema pelajar aku tumu ambih, semina kediri aja nguan rumah.
Apai enggau indai bisi muka bisnes perengka baju iban moden. Laban ke bisi penglandik dalam bidang bejahit, Indai muka bisnes begaga ke baju moden iban. Apai ke bisi penglandik dalam bidang bisnes besaup nulung indai ngemansang bisnes seduai.
Taja aku diau kediri di rumah kadang-kadang, bisi mega aku asai lantang ati mimit laban ke enda kiruh meda ayas sebayan agi.
Taja pia pansut depan rumah bisi mega sebayan ayan. Endur ti suah bendar diseliah ke aku iya nya sungai, ba sungai nya endur diau bala antu sungai enggau bala sebayan ti parai ba sungai. Sepemanjai aku ke ulih meda sebayan, aku semina nemu semengat orang ti udah nadai semina ulih bejalai sereta diau ba endur sida ti nadai aja. Pia mega, mua sebayan bepanggai enggau bakani sida nadai suba. Enti nyema sida ngejang ke menua nadai pala tauka tubuh, bakanya mega mua sida lebuh ke nyadi sebayan. Enti nyema sida mati ngantung diri, bakanya mega ulah sida maya nyadi sebayan.
Pengaga ati aku laban ke ulih nyeliah ke diri ari meda sebayan semina baka pengelebat buah aja. Lebuh iya lebat mayuh buah tang lebuh iya nadai buah anang guai ngumbai nadai buah taja buah nadai tang bungai bisi dipeda.
Semina siti utai ngalit ati aku ke diatu iya nya TUTOR aku.
"Aku Jessica, tutor nuan sepemanjai pelajar tua tu ila. Aku major ba bidang seni kebudayaan ti benung belajar mega. Ngajar nuan tu sigi ari penatai pemisi aku dikena aku nampung pelajar aku ba U. Rindu betemu enggau nuan Remy" .
Tutor Jessica ngembuan peninggi sereta tubuh baka model. Mua iya burak baka kapas beresi, buk iya lurus tebal, ngembuan tuchum ti manis sereta bisi tai lalat mesai batang mancis ba kiba mata iya. Sada nyawa tutor Jessica manah amai didinga lebuh iya ngajar. Sema jaku, semua utai pemanah diempu iya magang. Siti aja ngalit ke ati aku, iya nya bau tubuh iya.
Enda ulih dibanding bau tubuh tutor Jessica,nadai kala aku nyium bau ti bansa tu. Lebuh iya wangi ti wangi ngasak amat, bilik penuh enggau bau wangi iya enda nyalah bisi ngembuan kebun bungai ba bilik.
"Nyangka tutor Jessica tu rindu ke bau wangi ti bansa tu, endang patut ga iya wangi mua beresi, pendiau beresi endang sigi patut ga iya manah gamal sigi orang nyaga pemanah diri" pia ku peragam ati aku.
Sepemanjai tutor Jessica ti ngajar enggau ngemata ka aku belajar kediri di rumah, nadai ga aku meda iya ngembuan ulah ti nyelai. Iya dipeda aku baka orang bukai mega nyamai bai berandau. Laban ke enda kala bisi bakih ngelama tu aku muai runding aku ke bekenang ke bau wangi ti selalu dikena iya nya. Nyangka aku ja kini nyium utai ti bau nyelai-nyelai ngelamatu.
........................................................
"Emmm.. ujan nyala ba luar. Angka laun tutor Jessica datai negi, manah ga aku belajar dulu awakka enda lama belajar legi " igau aku kediri lebuh ke nutup jendela. Enda lama udah nya,
Dinggg... donggg....
"Tutor Jessica udah datai~♡" pengaga ati lalu belari muka pintu ke tutor Jessica.
"Remy~♡ minta ampun laun mimit aku datai laban kelas aku tadi laun ambis" ku tutor Jessica lalu tama ke bilik. Iya nutup payung iya lalu disimpan ba alai payung empu ba sepiak pintu.
"Duduk" ku aku. Enda nemu nama kebuah aku asai ke enggai bejaku kali tu. Nama amat ke enda utai peda aku tu ? Tauka mata aku udah dikalih ke antu sekumbang aku enda meda sebayan ? Nama tu ukai tutor Jessica ?
Aku enggai pechaya utai baru dipeda aku ba tutor Jessica. Aku lalu duduk damping tutor Jessica baka selama.
"Saritu aku ngaga latih, nuan semina ngemata aja" pia ku aku bejaku megai bup ke ba depan aku. Aku enggai meda mua iya. Aku semina ulih nunduk kepala aja. Deka bejaku pen enda sanggup,nyangka tu meh utai ti bau ngelama tu. Nama kebuah aku enda meda iya ngelama tu ? Bakani baru saritu iya ayan ? Nama ngelama tu iya sigi bisi enggau kami duai tauka iya enggau tutor Jessica?
Enda lama udah nya, aku pen bejaku "Nuan pechaya ka antu bisi ba dunya ?" aku enggai malik meda mua iya, enda nemu bakani ke mua iya lebuh ninga ke jaku aku.
".. Enda .. " ku saut tutor Jessica.
Bisi mega aku ka nanya sapa ba sepiak iya NYA. Aku nadai daya deka malik ngagai seduai iya. Ati takut mega bisi laban ke enggai tutor Jessica keji ke aku enti nyema iya nemu aku ulih meda sebayan tauka antu. Kada enda iya negi baka apai enggau indai? Bebali ati enti aku madah ke iya? Kada enda kumbai iya tuyu aku negi?
Aku merani kediri empu deka meda mua orang ke sepiak tutor Jessica.
Nadai meh utai ngenyai nya mua udah dipeda aku. Mata iya besai merah nyau deka tanggal. Buk iya tusut disema baka sempulut wi, dilah iya panjai ngerimbas kuyu tutor Jessica. Kadang iya nilat kuyu tutor Jessica, kadang semina liur iya besepur ayan baka leka asi. Ngeli iya jarang, nadai lubang idung tubuh iya bepanggai ba belakang tutor Jessica enda nyalah baka ke dilekat orang. Jari sereta tubuh iya kurap. Ulah iya nyau baka anak biak enggai jauh ari indai, jari merap tutor Jessica ari belakang enggau dilah iya meruan ayan.
Nadai meh aku kala meda utai ti bansa tu ngelama tu.
Nyangka tu dikumbai sida iya antu. Iya dipeda aku, antu nya ti nadai kiruh ke aku merati ke iya. Enda nyalah iya udah nemu aku tu ulih meda iya. Alit ati ku meda iya ti enggai limpang ke merap tutor Jessica. Bakani tutor Jessica tau bulih iya tu ? Patut ke enda aku madah ke tutor Jessica? Bisi mega aku kasih meda tutor Jessica enggai ke antu nya makin ngeregau pengidup iya ila.
~~~~~~~~~~~~~~~~~~~~~~~
Penemu penulis :
Ba sentang tu, apai Remy nya m'nunjukn mentality kitai ke diatu. Pama anak bisi sakit tauka bisi penusah nadai ati deka ninga cherita ari anak dri empu. Terus ngaga conclusion, bisi mega apai indai ke tegas nya enda salah tegas enggau anak tang dnga pjelasn anak, enti nyema bisi salah, ndai salah ngjar anak. Pia mega, indai Remy tu mega nunjuk ke sekeda ulah apai indai enti meda anak sakit alu enda kiruh sereta enggai b'tanggungjwb nggai anak dri empu. Enda ngira anak sakit tauka bisi masalah anang enggai ninga cerita anak dri empu. Maya tu meh kitai ninga nama utai dirunding sida, enti nyema bala anak udah besai udah berunding panjai, maya nya nadai sida deka bekungsi cerita agi enggau apai indai sida laban apabila sida iya udah besai sida iya nemu patut ke enda iya bekungsi crita diri enggau apai indai. Kemayuh agi bala anak enti udah besai, sida rindu ngemula ka apai indai bisi mega sida ngemula ke apai indai atas niat enggai ke apai indai irau ke sida. Ambi ke chunto apai indai Remy tu, munyi ku orang "nembiak tu innocent, sida bcrita smua utai tang anang sampai sida putus pengarap enggai ke mai pengerugi jemah ila ".
Terima kasih udah meri support ngagai cerita aku. Share enggau bala bakih au😳😋 god bless you😘
No comments:
Post a Comment